UN INNOMMU IN SARDHU I LA SOTZIEDDAI D'ABÀ - Sassari.tv
FABIDEMMU IN SASSARESU
UN INNOMMU IN SARDHU I LA SOTZIEDDAI D'ABÀ
L'althra dì era a una raprisintazioni di triatu a Sassari. Era pusaddu a piz’a pari di kisthi giovanotti. A candu un furanu ki era cun eddi s’è posthu a liggì l’immuggiaddittu e, tandu, l’erencu di l’attori. Arribiddu a kisth'innommu ki finia cu’ la "u", abesumeu di calche pianeta luntanu, s’è arriggiddu un’ischuttaredda e n’è isciddu: «Questo l’hanno sbagliato scrivendo!». Mancu l’è juntu a cabbu ki era, o ki pudia ass&eacuta;, un innommu in sardhu o in sassaresu.
DI Fabritziu Dettori
 
 
 

L’althra dì era a una raprisintazioni di triatu a Sassari. Era pusaddu a piz’a pari di kisthi giovanotti. A candu un furanu ki era cun eddi s’è posthu a liggì l’immuggiaddittu e, tandu, l’erencu di l’attori. Arribiddu a kisth’innommu ki finia cu’ la “u”, abesumeu di calche pianeta luntanu, s’è arriggiddu un’ischuttaredda e n’è isciddu: «Questo l’hanno sbagliato scrivendo!». Mancu l’è juntu a cabbu ki era, o ki pudia assé, un innommu in sardhu o in sassaresu.

È inutiri a cuallu: soggu fabbiddendi di l’innommu me’ figlioru. È sutzessu umbè di volthi ki calche prufissori a ischumentzu di l’ischora, o li suprenti, li dighiani: «Sei romeno?»; «Sei portoghese?»; «Di dove sei?». A falli cumprindì ki l’innommu soiu è sardhu e no fini cu’ la “o”, ma cu’ la “u”, vi vo Sant’Arò! Pa dinni una: candu s’è grisimaddu i la Jesgia di Santu Giuseppi e cu’ lu paddrinu è arribiddu addanantzi a l’atzibeschamu, mi pari lu ki v’è abà, kisthu l’à priguntaddu cumenti si ciamaba, a la ripostha di me’ figlioru s’è posthu, pa sighì una foimma di bonagratzia, a fabidalli… in ipagnoru! Ossinnò tutti li volthi ki m’ani dittu: «Il nome, non il cognome!»; «Ma lo chiamate così»?! Vai innorabona! Si ti soggu dizendi ki è fintzamenta registhraddu digussì, cumenti lu debu di ciama? «Si, però a me non mi esce di chiamarlo con la “u”». Insomma, v’è abbarradda mentari ki no si credi.

No soggu, parò, incrisciddu pa kisthi rasgioni: candu s’era ditzisu di no punilli innommi itariani, cunniscia lu “poburu” meu e li diburezi di la sotzieddai sardha in fattu di cunvintzioni culturari e d’apparthinentzia a la Sardhigna. Ma cumenti fazini tandu kisthi passoni candu so a cuntattu cun un sanghinaddu sardhu – ki mancarri eddi puru ani – ki fini lu matessi cu’ la “u”? Pazentzia, kisthu è un ciaschu inevitabiri ki no si po ciambà…

Lu fattu ki l’ischema ki ani in cabbu ponghia unu stop a l’innommi sardhu-sassaresi, è un signari ki dizi: “Eu no mi riccunnosciu e no vogliu fà parthi di kisthu diarettu”. Lu ki più mi dipiazi è propiu kisthu: ki no isisthia l’assibisthu, o la cussentzia, arumancu i la cabura di la linga mea, d’assé cumuniddai linghisthigga pronta a ischumpassà kissa lacana “diarettari” pa jumpì a l’uffitziariddai di lu sassaresu. A doru mannu fintzamenta i li cunvegni e cuncussi ad hoc, ki dubaristhiani sivvì puru a frabiggà una pratigga linghisthigga sassaresa, li riratori ni boggani a pizu soru lu pagliusummu di l’itarianu standard.

No si po pratindì, tandu, si li giobani, in un automatismu kena cussentzia, si ponini fóra da la sardhiddai linghisthigga e culturari. No ani l’esenpiu! Eddi no n’ani cuipa, antzi eddi so l’effettu, li vittimi ignari, di un prutzessu puritiggu di dessardhizatzioni ki è andendi addanantzi da ginnirazioni. La situazioni di lu sassaresu, e di lu sardhu, i li giobani è grabi. La ripunsabiriddai è di la Regioni ki ancora è nighendi a li pitzinni, masci e femmini, lu dirittu di vibì una sardhiddai pusitiba e firitzi. La Regioni, e no più l’Isthaddu itarianu, ki à innommu e sanghinaddu i li passoni ki l’ani e la so gubinneddi (li matessi ki andani in Cossigga a fabiddà di identiddai) è, arreu-arreu, jirendi l’ipaddi, in pienu tradimentu mannu, a lu poburu sardhu. Di fattu, la puritigga linghisthigga di kistha isthituzioni è fraitza e finta.

 
 
 

© 2017 www.sassari.tv - Tutti i diritti riservati - Cookies Policy - Credits